طريقة عمل جدول محتويات Word

ازاي اعرف اعمل فهرس محتويات لكتاب او بحث باستخدام برنامج معالجة الكلمات او النصوص MS Word

كثير منا يعرف طرق  التعامل مع برنامج معالجة النصوص word  لكن كيفية عمل فهرس محتويات لبحث او كتاب تم كتابته وتنسيقه باستخدام الوورد هو الامر الذي سنتخدث عنه الان ، وفيما يلي شرح بالصور لكيفية انشاء فهرس محتويات  باستخدام Table of contents 

بص ياسيدي في الاول عشان حضرتك تقدر تعمل فهرس او جدول محتويات لازم تكون واقف على كل عنوان انت عايزة يظهر في الفهرس وتقول للتطبيق اني عايزك تعامل العنوان ده على انه عنوان ،
يعني ايه الكلام ده ما انا عامل عليه التنسيقات اللي تقول انه عنوان ميزته بنوع خط وحجم الخط مختلف عن  باقي النصوص وسميك وتحتية خط كمان !
اقولك كل اللي انت عامله ده كويس جدا وهيظهر النص ده على انه عنوان ليك انت ولما هتطبع لكن التطبيق مش هيتعامل معاه على انه عنوان ولكن هيظل التعامل معاه على انه نص عادي جدا لكن مميز عن باقي نصوص الملف بنوع خط معين وحجم اكبر ليس الا
امال ايه اللي يخلي التطبيق يتعامل مع النص ده على انه عنوان او عنوان فرعي ( مثال الباب الاول - فرعي منه الفصل الاول )
اقولك احنا طول عمرنا بنشوف البتاعة دي اللي اسمها Style ضمن التسيقات لكن قليل لما بنستخدمها اقولك هو ده وقتها

من الاخر احنا لازم نقول للتطبيق ده عنوان Heading 1 او عنوان فرعي Heading 2  عشان يقدر بعد كده لما ادخل اقوله اعمل جدول محتويات او فهرس للعنوان والعنوان الفرعية يقولي حاضر من عنينا وده هيحصل لما حضرتك تروح على كل عنوان وتحدده وتختار من المجموعة Styles  اللي فوق دي اذا كان عنوان رئيسي Heading 1  او عنوان فرعي Heading 2  او فرعي اقل مستوى من السابق Heading 3 .

طب وادخل ازاي اقوله اعمل جدول محتويات او فهرس زي ما انت بتقول

بعد ما حضرتك تنتهي من تنسيق العناوين في الملف ادخل على التاب اللي اسمها References  ومنها على Table of content

وكل اللي هتعمله اما انك تختار من التنسيق الجاهز اللي قدامك ده او انك تدخل على Custom Table of content عشان تحدد ايه من العناوين اللي انت عايزه يطلع في الفهرس وشكل النقط الواصل بين العنوان ورقم الصفحة الموجود فيها العنوان من خلال الخيارين Tab leaden  والاداة  Show levels كما هو ظاهر في الشكل التالي 

وزي ما حضرتك شايف كده انا حددت تنسيق الخط الفاصل بين العنوان ورقم الصفحة الموجود فيها بخط نقطي وفي الاداة الخاصة بتحديد مستويات العناوين المراد فهرستها انا حددت 3 مستويات لان عندي الدرس .......... ده Heading 1  والموضوع تحت الدرس ده Heading 2  يعني المستوى الثاني وفيه عندي كمان موضوعات فرعية من كل موضوع ودي عاملها Heading 3 

وبعد الضغط على OK  هيظهر فهرس محتويات او جدول محتويات ولكن يحتاج الى بعض التنسيقات ليظهر الفهرس كما يلي 

هنلاحظ بقى هنا ان حضرتك بمجرد تمرير مؤشر الماوس على اي نص من النصوص في فهرس المحتويات هيقولك لو عايز تلينك للعنوان ده اضغط كنترول Ctrl ثم اضغط بزر الماوس للانتقال الى مكان العنوان في الملف 

هاااااام جدا : طيب في حالة اني عملت تغيير على الملف مثلا واضفت درس جديد او موضوع جديد تحت درس من الدروس السابقة او حتى اضفت بعض المعلومات لموضوع معين ترتب عليه ترحيل البيانات في الموضوعات التالية من صفحاتها الى صفحات تالية او حتى حذف موضوع ترتب عليه الترحيل للبيانات للاعلى  ؟

هنا بقى مش لازم حضرتك تحذف الجدول او الفهرس وتبدء من جديد في انشاء فهرس جديد ولكن كل المطلوب من حضرتك اما الضغط بزر الماوس الايمن في اي منطقة داخل جدول المحتويات او الفهرس كما يلي 

او باستخدام شريط الادوات References  ثم Update Table  كما بالشكل التالي 

  

ليظهر لنا مربع حواري الغرض منه تحديد ما اذا كان التحديث المراد تطبيقة على الجدول كامل بمعنى تغيير في محتوى الفهرس وبالتالي ترقيم الصفحات زي ما يكون كده بنعمل جدول جديد 

ام ان الغرض من التحديث مجرد تصحيح لارقام الصفحات في الجدول وطبعا اختياري لأحد الامرين هيتوقف على نوع التعديل اللي انا عملته على الملف 

مثال لو كان التعديل على الملف مجرد اضافة نص جديد الى الموضوعات السابقة ترتب عليه ازاحة نصوص وموضوعات وترحيلها الى صفحات اخري ، في الحالة دي انا مش محتاج غير تحديث لارقام الصفحات 

اما لو كان التغيير تم باضافة موضوعات جديدة مثلا او عناوين جديدة او الغاء عناوين ففي هذه الحالة يتم التحديث على الجدول بالكامل