وظيفة الجدول المحوري Pivot Table وطريقة انشاءه والتعامل معه

 ساعات كتير بيكون عندنا جداول بيانات تحتوي على كم كبير من البيانات واللي بتكون سبب في عدم فهم البيانات بشكل صحيح او بذل جهد اكبر في محاولة فهم البيانات دي وتلخيصها .

وعشان تلخيصها دي بقا الجماعة بتوع ميكروسوفت عملولنا في الاكسيل حاجة معظمنا يسمع عنها ومنا كتير خبير في التعامل معاها وهي الجداول المحورية Pivot Table  ودي من اسمها كده تحس انها لغرض تلخيص البيانات اللي في الجدول الكبير اللي عندنا ده وما احناش فاهمين منها اي حاجة ولا عارفين نبني تحليل صحيح ليها

طريقة انشاء الجدول المحوري Pivot Table 

بعد فتح ورقة العمل اللي فيها الجدول بتاعنا واللي هو عبارة عن جدول فواتير لطلبيات فروع شركة متخصصة في اجهزة الحاسب الالي وملحقاتها 

نروح على Insert  ومنها نختار الاداة Pivot Table  على يسار شريط الادوات 

هيظهر لينا المربع الحواري Create Pivot Table

عند الخيار Select a table or range  حضرتك هتحدد نطاق الخلايا المكون للجدول انا هنا عامل تسمية للجدول بالاسم اللي ظاهر قدام حضراتكم ده Table4 ، وفي الخيار الثاني بيقولي هو حضرتك عايز الجدول المحوري اللي احنا شغالين فيه ده يظهر فين او يتم انشاءه فين ؟؟ 

- في ورقة عمل جديدة  وده خيار محترم بصراحة 

- ولا في نفس ورقة العمل الموجود فيها جدول البيانات 

انا عن نفس قلتله عايز الجدول المحوري في ورقة عمل جديدة New Worksheet   ثم   OK

 فتم انشاء ورقة عمل جديدة بالشكل التالي

هنلاحظ بقا في ورقة العمل الجديدة دي كام حاجة كده 

اولاً فيه رسم على الشمال انا مش عارف ده بتاع ايه 

ثانيا فيه لوحة على اليمين فيها كام حاجة كده هنلاحظ فيها عناوين رؤوس الاعمدة او محتوى صف العناوين في الجدول الاساسي وهيا دي الحقول اللي احنا هنستخدمها في انشاء الجدول المحوري 

في الاول عايز حضرتك ترسم تخيل لشكل الجدول اللي انت عايزه يلخصلك بيانات الجدول الكبير الرخم ده 

وهنا هنلاقي ناس تخيلت الجدول بالشكل ده 

وناس تانية شافت الجدول بالشكل ده 

وناس ثالثة اتخيلت الجدول بالشكل ده

وطبعاً زي ما حضراتكم شايفين الاشكال الثلاثة قامت بالواجب وزيادة وكانت كفيلة تلخصلنا البيانات " عرض اجمالي الطلبيات لجميع الفروع وفقا لاسم المنتج مع امكانية تصفية البيانات وفقاً للعام " لكن كل شكل يختلف عن الاخر في طريقة عرض البيانات مش اكتر وده اللي هيحددة حضرتك بمعنى مين في دول انسب لعرض بياناتك وبناءً علية هبدء اسكن الحقول في المنطقة الخاصة بتقسيم الجدول كما بالشكل السابق 

عناوين الاعمدة Columns : وهنا انا سحبت حقل المنتج عشان يظهر كما بالشكل السابق " الاخير " كعناوين للاعمدة المكونة للجدول المحوري

عناوين الصفوف Rows :  وفيها زي ما حضراتكم شايفين اخترنا اسم الفرع 

وتجميع البيانات بناءً على Values :  وفيها حضرتك ختشوف انت عايز تجمع اي بيانات 

ولو فيه فلاتر هتكون Filters  : هنا بقى انا بحدد لو حابب اعمل تصفية للبيانات في الجدول بناءُ على حقل معين زي اني اعرض اجمالي بيانات الطلبيات لجميع الفروع من كل منتج ولكن خلال الربع الثالث من عام 2003